Qan təzyiqinə nəzarət funksiyası, Apple Watch-un sağlamlıq sahəsindəki əhəmiyyətli yeniliklərindən biri olacaq. Bloomberg-in Mark Gurman-a istinadən verdiyi məlumata görə, bu xüsusiyyət istifadəçilərə birbaşa sistolik və ya diastolik dəyərləri təqdim etməyəcək, lakin qan təzyiqindəki yüksəliş tendensiyalarını müəyyənləşdirərək erkən xəbərdarlıq edəcək. Bu sayədə hipertoniya riski olan istifadəçilər erkən tədbirlər görə biləcəklər.
Apple Watch -da Qan təzyiqinə nəzarət necə işləyəcək?
Yeni qan təzyiqinə nəzarət funksiyası, gündəlik təzyiq dəyişikliklərini izləyərək hipertoniya əlamətlərinin aşkarlanmasında istifadəçilərə dəstək olmağı hədəfləyir. Bu xüsusiyyət tam ölçümlər təqdim etməsə də, təzyiq artışlarını izləyərək avtomatik xəbərdarlıqlar göndərəcək. Məqsəd, istifadəçiləri vaxtında tibbi yardıma yönləndirməkdir.
Hipertoniya, ürək xəstəlikləri və ölüm riskini artıran səssiz təhlükə kimi tanınır. Çox vaxt aşkar simptomlar göstərmədiyi üçün erkən diaqnoz həyati əhəmiyyətə malikdir. Apple Watch-un bu funksiyası, artıq mövcud olan atrial fibrilyasiya (ürək ritm pozğunluğu), EKG ölçmələri və qan oksigen səviyyəsi kimi sağlamlıq xüsusiyyətləri ilə birləşərək daha geniş bir sağlamlıq monitorinqi təmin edə bilər.
Hansı modellərdə olacaq?
Məlumatlara görə, Apple bu funksiyanı Apple Watch Ultra 3 modeli ilə birlikdə təqdim etməyi planlaşdırır. Lakin xüsusiyyətin standart Apple Watch modellərində də mövcud olacağı gözlənilir. Əvvəllər bu funksiyanın 2024-cü ildə təqdim edilməsi planlaşdırılırdı, lakin testlər zamanı dəqiqlik problemləri ilə üzləşildiyi üçün təqdimat 2025-ci ilə təxirə salınıb. Apple hazırda bu problemləri həll etmək üzərində çalışır.
Başqa hansı sağlamlıq yenilikləri gözlənilir?
Apple, yalnız qan təzyiqi ilə kifayətlənmir. Şirkət invaziv olmayan qan şəkəri monitorinqi kimi digər innovativ sağlamlıq xüsusiyyətləri üzərində də işləyir. Lakin bu texnologiyanın hazırda kommersiya istifadəsinə tam uyğun olmadığı bildirilir.
Apple, istifadəçilərin sağlamlığını daha yaxşı dəstəkləmək və bu sahədə lider mövqeyini qorumaq üçün tədqiqat və inkişaf işlərini davam etdirir. Qan təzyiqinə nəzarət funksiyasının isə bu hədəfə əhəmiyyətli bir töhfə verəcəyi gözlənilir.
Alış-veriş edin, keşbek qazanın və maliyyənizi idarə edin
Hamısı bir tətbiqdə!
